Apr 6, 2019

شرح الكمبيالة 

شرح  الكمبيالة بطريقة يسيرة جدا للفهم : 
السداسي الرابع S4
الكمبيالة: هي واحد الورقة تيكتبها ليك شي مسخوط الوالدين بغا فيك الخدمة، بلاصة مايعطيك فلوس تاتبرق، تايغول ليك سير عند عباس بن فرناس راني تانتسال ليه مليون و قول ليه يعطيك حقك و يقطعو من حسابي. 
مسخوط الوالدين : الساحب عباس بن فرناس : المسحوب عليه انت : المستفيد. ديك الورقة اللي عطاك الساحب كاينين فيها البيانات الإلزامية ضروري باش تولي صحيحة و خاضعة للقانون التجاري .

المهم ديك الورقة غادي تلقا فيها تاريخ الإستحقاق، إلا ماكانش فيها تاريخ الإستحقاق تتولي مستحقة بمجرد الإطلاع بحال الشيك، المهم نفترضوا حنا أن الساحب دار فالورقة أنها مستحقة بتاريخ 2019 شهر 7 نهار 12 واش نتا فيك اللي يتسنا تال هاذ التاريخ ؟ إلى فيك ماینتسنا تسنا، أوا إلى كنتي زربان و بغيتي اللعاقة زعما الفلوس , عندك بزاف دالحلول، مثلا يمكن ليك تبيعها للبنك و هذا تايتسما الخصم ولكن غادي يكون البنك ضرب فيك همزة. يمكن ليك كذلك أنه تظهرها لشي واحد أخر، مثلا تمشي تشري عند شي واحد سلعة تتساوي قيمة الكمبيالة، وبلاصة ما تخلصوا قوالبوا ودير ليه مفاجأة هههه بلاصة ماتعطيه فلوس لبق ليه ديك جعبوقة ديال الكمبيالة اللي عطاك داك المسخوط فالأول. و حتي هو يمكن ليه يظهرها لواحد أخر...... إلى أخره حتی يوصل 12\07\2019 ,و أخر ضحية بقات عندو الكمبيالة ( الحامل الشرعي ) غادي يديها لعباس بن فرناس و غادي يغول ليه هاد الورقة الله ارحم ليك الوالدين خلصها ليا. يقدر يخلصها ليه، و يقدر ما يخلصهاش ليه يقدر يقول ليه راني كنت مدين لمسخوط الوالدين لكن رجعت ليه فلوسو طبعا هذا دفع شخصي ماغاديش يتقبل، وخاص الحامل يدير الإحتجاج عند كاتب الضبط لدى المحكمة التجارية، و يعلم المظهر اللي ظهرها ليه ... و 90% غادي يشد الحامل الشرعي رزقوا، و يمشي فحالوا بحال إلى ماطرا والوا.


جميع الحقوق محفوظة 2019 Faculté des Sciences Juridiques Economiques et Sociales Souissi                                                                                                                           www.fsjesouissi.com     الطالبة سلمى